రాబర్ట్ వాద్రా కధా కమామీషు

1997 లో 28 ఏళ్ళ ఓ యువకుడిని సోనియా గాంధీ ముద్దుల కుమార్తె ప్రియాంక గాంధీ ప్రేమించి పెళ్ళాడినప్పుడు ఆ కుటుంబం సంగతి యేమో కాని దేశం యావత్తు నివ్వెరపోయింది. అంతకు 55 ఏళ్ళ క్రితమే 1942 లో జవహర్ లాల్ నెహ్రూ ఏకైక కుమార్తె ఇందిరా ప్రియదర్శిని తన తండ్రి అభీష్టానికి వ్యతిరేకంగా పార్శీ కుటుంబానికి చెందిన ఫిరోజ్ గాంధీని (వాస్తవానికి జాతిపిత మహాత్మా గాంధీకి ఈ ఫిరోజ్ గాంధీకి ఎలాటి బంధుత్వం లేదు) పరిణయం ఆడిన దగ్గరనుంచి ఇలాంటి వివాహాలకు ఆ కుటుంబం బాగా అలవాటు పడిపోయిందనే చెప్పాలి. తదనంతర కాలంలో రాజీవ్ గాంధీ ఇటలీ వనిత సోనియాను, అతడి తమ్ముడు సంజయ్ గాంధీ, మేనకా (మనేకా) గాంధీని పెళ్ళిచేసుకుని తమ తలిదండ్రుల సంప్రదాయాన్ని కొనసాగిస్తే, సోనియా గారాలపట్టి ప్రియాంక గాంధీ రాబర్ట్ వాద్రా ను పెళ్ళాడి మూడో తరంలో కూడా ప్రేమ వివాహాల వొరవడిని మరింత ముందుకు తీసుకువెళ్ళింది. ఆమె తమ్ముడు రాహుల్ గాంధీ మాత్రం ప్రేమ వివాహం మాట సరే అసలు పెళ్ళిమాటే తలపెట్టడంలేదు.

 

ఇక ప్రస్తుతానికి వస్తే, రాబర్ట్ వొధేరా అనాలో రాబర్ట్ వాద్రా అని పలకాలో ప్రియాంకాతో పెళ్లినాటికి ఎవరికీ అంతుపట్టని ఆ వ్యక్తి bhandaru with text copyఈనాడు మీడియా దృష్టిని ప్రముఖంగా ఆకర్షిస్తున్నాడు. నిజానికి అతడీనాడు అంత అనామకుడేమీ కాదు. కాంగ్రెస్ అధినేత్రి, యూపీయే అధినాయకురాలు అయిన సోనియా గాంధీకి స్వయానా ఇంటల్లుడు కావడం అతడికింత ప్రచారం రావడానికి కారణాలు కావచ్చు. అయితే, హమేషా మీడియా దృష్టి పడే కుటుంబానికి చెందినవాడే కాని మీడియా దృష్టిపెట్టాల్సినంత మనిషి కాదు రాబర్ట్ వాద్రా. అయినా కానీ, ఈనాడు అందరి దృష్టీ అతడిపైనే వుంది.

 

1969 లో జన్మించిన రాబర్ట్ వాద్రా పెద్ద శ్రీమంతుల కుటుంబం నుంచి వచ్చినవాడేమీ కాదు. తండ్రి రాజేంద్ర వాద్రా ఒక సాధారణ వ్యాపారి. కొయ్యతో, ఇత్తడితో చేసిన బొమ్మలను, వస్తువులను విక్రయించే వ్యాపారం. తల్లి మౌరీన్ స్కాటిష్ జాతీయురాలు. ప్రియాంకాతో పెళ్ళయిన తరువాత రాబర్ట్ కు తండ్రితో పొసగలేదు. ఒక దశలో తండ్రికీ తనకూ సంబంధం లేదని పత్రికల్లో ప్రకటనలు కూడా ఇచ్చాడు.

 

ఇక ఈ వివాదంలో చిక్కుకున్న మరో వ్యక్తి కుశ్ పాల్ సింగ్. తన మామగారినుంచి దక్కిన వ్యాపారాన్ని అభివృద్ధి చేయడం కోసం తన శక్తియుక్తులన్నీ ఉపయోగించాడు. మామ రఘువేంద్ర సింగ్ స్తాపించిన డీ.ఎల్.ఎఫ్. సంస్థ నష్టాల వూబిలో కూరుకుపోయివున్న తరుణంలో, కుశ్ పాల్ సింగ్ అందులో తన వాటాలను అమ్ముకోవాలని ఒక దశలో అనుకున్నాడు కూడా. కానీ, అప్పటి ప్రధాని ఇందిరా గాంధీ కుమారుడు రాజీవ్ గాంధీతో యాదృచ్చికంగా జరిగిన పరిచయం కుశ్ పాల్ సింగ్ జీవితాన్ని సమూలంగా మార్చివేసింది. సింగ్ వ్యాపారాన్ని ఆకాశం అంచులకు తాకించింది. ఫలితంగా ప్రపంచంలోని అత్యంత ధనికుల జాబితాలో ఆయన పేరు చేరింది. రాజకీయ ప్రాపకం వుంటే ఏదయినా సాధ్యం అని కుశ్ పాల్ సింగ్ నిరూపించాడు. అత్యంత సంపన్నుడయిన సింగ్, అత్యంత రాజకీయ ప్రాపకం వున్న రాబర్ట్ నడుమ వ్యాపార సంబంధాలు బలపడడంలో ఆశ్చర్యం లేదు. వారిరువురి మధ్యా ఇచ్చిపుచ్చుకునే ధోరణిలో సాగిన ఆర్ధిక లావాదేవీలనే కేజ్రీవాల్ బయటపెట్టి సంచలనం సృష్టించారు.

 

కాంగ్రెస్ పాలిత రాష్ట్రాలలో డి.ఎల్.ఎఫ్ అనే ఓ బడా సంస్థకు లాభం లేదా మేలు జరిగేలా సోనియా అల్లుడిగా రాబర్ట్ వాద్రా పలుకుబడి ఉపయోగపడిందని, దానికి ప్రతిఫలంగా వాద్రాకు డి.ఎల్.ఎఫ్. కొన్ని కోట్లు విలువచేసే ఆస్తులను కట్టబెట్టిందని కేజ్రీవాల్ ఆరోపించారు. రియల్ ఎస్టేట్ రంగంలో వున్న డి.ఎల్.ఎఫ్. సంస్థ, అరవై ఐదుకోట్ల రూపాయల వడ్డీలేని, పూచీకత్తు అవసరం లేని రుణాన్ని రాబర్ట్ వాద్రాకు ఇచ్చిందన్నది కేజ్రీవాల్ సంధించిన మొదటి అస్త్రం. వ్యాపార లావాదేవీల్లో డబ్బు సర్దుబాట్లు చేసుకోవడం నేరం కాకపోవచ్చు. కానీ, ఇంతపెద్ద మొత్తాలు చేతులు మారుతున్నప్పుడు ఆ విషయం ఆదాయపు పన్ను శాఖకు తెలియకుండా జరగడానికి అవకాశం వుండదు. అయినా ఆ శాఖ మిన్నకుండా వున్నదంటే కచ్చితంగా రాబర్ట్ వాద్రా సోనియా కుటుంబంలో సభ్యుడు కావడమే కారణమని కేజ్రీవాల్ అభిప్రాయపడుతున్నారు.

 

ఆయన అంతటితో ఆగలేదు. మరికొన్ని ఆధారాలతో కూడిన కొత్త ఆరోపణలు చేశారు. ‘నేను నీకీ పని చేసిపెడతాను. ప్రతిఫలంగా నువ్వు నాకు ఇది చేసిపెట్టు అనే పద్ధతిలో (ప్రస్తుతం ఈ వ్యవహారాన్ని క్విడ్ ప్రోకొ అని సంక్షిప్తంగా పేర్కొంటున్నారు) డీ.ఎల్.ఎఫ్., వాద్రాల నడుమ అనేక రకాల లావాదేవీలు సాగాయని కేజ్రీవాల్ వాదన. ఏదిఏమయినా ఇప్పుడు రోజులు మారాయి. కేంద్రంలో యూపీయే అధికారానికి దూరం అయింది. అవినీతిని కూకటివేళ్ళతో పెకలిస్తామంటూ మోడీ ప్రభుత్వం కేంద్రంలో కొలువు తీరింది. కాంగ్రెస్ పార్టీపై నెహ్రూ గాంధీ కుటుంబ పెత్తనాన్ని ప్రశ్నించే రీతిలో కాంగ్రెస్ వర్గాల్లో గుసగుసలు మొదలయ్యాయి. ఇవన్నీ సోనియాకు ఇబ్బంది కలిగించే విషయాలే.

 

దుష్టాంగాన్ని ఖండించి శిష్టాంగాన్ని కాపాడుకోవాలన్నది నీతి వాక్యం.
నన్నయ మహాభారతంలో ఒక పద్యం వుంది.
‘ఒరులేయవి యొనరించిన
నరవరయప్రియము తన మనంబునకగుదా
నొరులకునవి సేయకునికి
పరాయణము పరమధర్మపధములకెల్లన్’ –
‘ఎవరు ఏమి చేస్తే నీకు అప్రియం అనిపిస్తుందో అదే పని నీవు ఇతరుల విషయంలో చేయకు’ అన్నది దాని తాత్పర్యం.
కాంగ్రెస్ అధినేత్రి ఏం చేస్తారో వేచి చూడాలి.

-భండారు శ్రీనివాసరావు

Have something to add? Share it in the comments

Your email address will not be published.